Tónlistarskóli Austur Húnvetninga
Námsframboð:
Í vetur verður boðið upp á kennslu á eftirtalin hljóðfæri:
Blokkflautu ( 6-7 ára nemendur),piano, harmonikku, tré- og málmblásturshljóðfæri, gítar, bassa, hljómborð, trommur og söng.
Einnig verður kennd tónfræði fyrir þá nemendur sem lokið hafa a.m.k. 1. stigi.
Skólaárið hefst 1. september og lýkur 14. maí.
Nemendur sem eru í heilu námi fá ½ klst. tvisvar í viku hjá einkakennara og auk þess er boðið upp á tónfræðitíma ( 1 klst. á viku) ef þeir hafa lokið 1. stigi. Nemendur sem eru í hálfu námi fá ½ klst. einu sinni í viku hjá einkakennara.
Haldnir eru 10-11 tónleikar yfir veturinn. Nemendur koma síðan fram við ýmis tækifæri a.m.k. 3-4. Haldnir verða jóla- og vortónleikar eins og venjulega.
Þá er hefð fyrir því að nemendur sem lokið hafa stigsprófi spili á skólaslitum Tónlistarskólans.
Stefnt er að því að halda áfram með áfangakerfi tónlistarskólanna.
Námsmat:
Nemendur fá einkunnarspjald að vori þar sem viðkomandi kennari gefur einkunn fyrir hljóðfæraleik, tónfræði og ástundun og aðaleinkunn sem er meðaltal þeirra þriggja. Nemendur fá einnig skriflega umsögn frá kennara þar sem hann metur árangur vetrarins, þ.e. nemendur taka ekki önnur próf en stigspróf.
Einkunnir eru gefnar í heilum og hálfum tölum á skalanum
1-10 þar sem 9-10 er ágætiseinkunn, 8-9 gott, 5-7 sæmilegt
og undir 5 slaklegt.
Aðrar upplýsingar:
Skólinn hefur átt langt og gott samstarf við grunnskólana í sýslunni. Þar ber helst að nefna að á Húnavöllum fara nemendur úr kennslustundum í grunnskólanum í tónlistartíma. Á Blönduósi fer blokkflautukennsla fram í grunnskólanum og nemendur teknir úr tíma en aðrir nemendur fara í Tónlistarskólann að Húnabraut 26. Á Skagaströnd er hluti nemenda á rúllandi tímatöflu líkt og á Húnavöllum.
Við skólann starfar öflug lúðrasveit sem í eru nemendur frá öllum kennslustöðum skólans og einnig úr Húnaþingi vestra.. Lúðrasveitin æfir á Blönduósi á miðvikudögum kl. 15.00.
Skipan tónlistarnáms:
Nám í tónlistarskólum skiptist í þrjá megináfanga: grunnnám, miðnám og framhaldsnám. Til grunnnáms telst einnig fornám, þ.e samþætt byrjendanám, sniðið að aldri og þroska ungra barna. Þessi áfangaskipting er óháð uppbyggingu almenna skólakerfisins. Engu að síður má finna þar nokkra samsvörun. Þannig samsvarar grunnnám u.þ.b neðri bekkjum grunnskóla, miðnám efri bekkjum og framhaldsnám svarar til náms á framhaldsskólastigi, þ.e. að háskólastigi. Slík viðmiðun er þó engan veginn einhlít þar sem nemendur hefja tónlistarnám á ýmsum aldri og námshraði getur verið mismunandi. Lok náms í tónlistarskólum er því ekki unnt að binda við tiltekinn aldur. Lengd námsáfanga miðast m.a. við kennslustundafjölda samkvæmt 1. grein laga um fjárhagslegan stuðning við tónlistarskóla, nr. 75/1985.
Áfangar og próf:
Hverjum megináfanga lýkur með áfangaprófum, þ.e. grunnprófi, miðprófi og framhaldsprófi, annars vegar í hljóðfæraleik og hins vegar í tónfræðigreinum. Jafnframt er heimilt að skipta námsferlinu í smærri áfanga eða stig. Áfangaprófum er ætlað að tryggja ákveðnar lágmarkskröfur í námi, festu og aðhald. Ljúka þarf báðum hlutum hvers áfangaprófs áður en heimilt er að þreyta það næsta. Til þess að ljúka framhaldsprófi þarf nemandi auk þess að halda sjálfstæða tónleika.
Grunnnám: fornám og I-III stig.
Miðnám: IV-V stig.
Framhaldsnám: VI-VII stig.
