Húnavallaskóli

Skólaslit Húnavallaskóla fóru fram í blíðskaparveðri klukkan 14:00 föstudaginn 28. maí.  Hátíðin hófst með því að lúðrasveit skólans lék nokkur lög undir stjórn Skarphéðins Einarssonar, skólastjóra Tónlistaskóla Austur-Húnvetninga. 

Dagskráin var með hefðbundnum hætti og hófst með því að séra Sveinbjörn R. Einarsson, sóknarbrestur flutti hugvekju, þá ávarpaði Líney Árnadóttir í Steinnesi samkomugesti fyrir hönd foreldra útskriftarnemenda og Hjörtur Þór Magnússon flutti ávarp fyrir hönd útskriftarnemenda.  Útskriftarnemendur í 10. bekk fluttu tvö tónlistaratriði en það voru Sandra Haraldsdóttir sem lék á klarinett og Hjörtur Þór Magnússon á trompet.  Fjórir nemendur hlutu sérstakar viðurkenningar við útskrift fyrir góðan árangur og námsáhuga.  Þetta voru: Stefán Logi Grímsson fyrir ensku, náttúrufræði og samfélagsfræði, Brynjar Geir Ægisson fyrir dönsku og stærðfræði, Klaudija Kaubryte fyrir íslensku og Hjörtur Þór Magnússon fyrir íþróttir.  Þórunn Ragnarsdóttir á Kornsá lætur nú af störfum við skólann eftir 25 ára farsælt og gott starf.  Var Þórunn heiðruð sérstaklega á skólaslitunum og Þorkell Ingimarsson, skólastjóri færði henni þakkir og gjöf frá skólanum.  Öll athöfnin tók um eina og hálfa klukkustund og lauk að venju með kaffiveitingum í borðsal skólans.