Þingeyrakirkja er opin frá 1. júní til ágústloka frá kl.10:00 til kl.17:00 alla daga ásamt þjónustuhúsinu. Þar eru snyrtingar einnig er hægt að fá keypt kaffi og súkkulaði. Þar er fyrirhugað að vera með sýningar og sölu á smávörum.
Kirkjan er sýnd á tilgreindum tíma án gjaldtöku.
Erlendur G. Eysteinsson mun taka við beiðnum um að sýna kirkjuna utan skráðs tíma og sinna því svo fremi hann
geti það, annarra verka vegna. Kostar það þá kr. 2.000 útkallið, sími 452-4294 og eða 843-9863.
Sjáið sögu Þingeyrakirkju.
Þingeyraklausturskirkja.
Þingeyrakirkja er byggð á árunum 1864 – 1877 af Ásgeiri Einarssyni er þá var bóndi og kirkjuhaldari
á Þingeyrum. Kirkjan er enn í sinni upphaflegu gerð.
Veggir kirkjunnar eru hlaðnir úr íslensku grjóti með kalki á milli 95 cm þykkir. Grjótið var
sótt vestur yfir Hópið, um átta km vegalengd, eftir ísilögðu vatninu.
Munir kirkjunnar tilheyrðu áður fyrri kirkjum á Þingeyrum.
Altaristaflan kom að Þingeyrum frá Nottingham á Englandi á 15. öld. Búin til úr alabastri. Hún var
upphaflega með vængjum .
Pretikunarstóllin er hollenskur gefinn af Lárusi Gottrup 1696.
Skírnarfonturinn er frá Danmörku gefinn af Lárusi Gottrup 1697 og skírnarskálin 1693.
Báðir eru þeir áletraðir nafni Gottrups sem var lögmaður fyrir Norður- og Austuramtið og sat hann á Þingeyrum.
Í skírnarfontinum er skírnarskál áletruð ártalinu 1693. Legsteinn af gröf Lárusar Gottrups og Katarinu konu hans frá 1721 er
varðveittur í anddyri kirkjunnar.
Á Altarinu eru vínkanna, kaleikur, patína og oplátuaskja allt úr silfri, gefið af Katarinu Kristjansen og
Jóhanni Lárussyni Gottrup árið 1713. Tveir kertastjakar fornir gefnir af Jóni S.Pálmasyni bónda á Þingeyrum um 1960. Róðurkross
gefinn á hundrað ára afmæli kirkjunnar af séra Þorsteini B.Gíslasyni prófasti í Steinnesi og frú Ólínu
Benediktsdóttir er nú staðsettur á pretikunarstólnum, ásmt tveimur kertastjökum frá 18 öld. Kristalsljósastika frá 1861 var
áður á altarinu en er nú varðveitt í Þjónustuhúsinu, ásamt tveimur Biblíum frá 1722 og 1728 og tveimur
sálmabókum fornum allt í skinnbandi sem áður voru geymdar í altarinu.
Ljósastjakar eru sjö á veggjum kirkjunnar frá 1697 – 1700, danskir, gefnir Lárusi Gottrup í kirkju sem hann
hafði byggt á Þingeyrum árið 1695 og stóð til 1819 þeir eru allir áletraðir með ártölum og stöfum gefendanna.
Ljósakrónur tvær hanga í lofti kirkjunnar eru mjög gamlar, einkum sú innri.
Á söngloftsbrík kirkjunnar eru útskornar myndir af frelsaranum og postulunum sem upphaflega voru gerðar í Norður
Þýskalandi á 16. öld og prýddu þá fyrri kirkjur á Þingeyrum.
Orgel er á söngloftinu frá USA kom í kirkjuna 1923. Tvær klukkur eru í turninum
Sú minni frá 1834 en sú stærri áletruð frá 1911./ Ásgeir Einarsson./ Guðbrandur
Einarsson.
