Þeir sem hafa áhuga á að koma við í Svínavatnskirkju er vinsamlegast beðnir um að hafa samband við Jón Gíslason Stóra-Búrfelli í síma: 452-7199 eða 868-3750. Opnunartími er eftir samkomulagi.
Svínavatnskirkja - saga.
Svínavatn er kirkjustaður austanvert við suðurenda Svínavatns og fyrrum þingstaður gamla Svínavatnshrepps sem tók nafn af staðnum. Sjálfur bærinn stendur spölkorn upp frá vatninu, vestan í Tungumúla (328m y.s.). Er þar víðsýnt á staðarhlaði og Svínavatn stór jörð og höfuðból.
Á Svínavatni var bændahlutinn stærri en kirkjunnar á jörðinni og hefur því ávallt verið bændagarður en ekki prestssetur á staðnum. Kirkjan, sem var helguð Pétri postula í kaþólskum sið, hefur verið útkirkja frá Auðkúlu svo langt sem heimildir ná.
Fram um miðja þessa öld var búið í stórum torfbæ á Svínavatni og sneru 5 stafnar vestur að vatninu. Norður af bænum var kirkjan á fyrri tíð, og í garði, en haustið 1882 var byggð ný kirkja er reist var suður og upp af bænum. Hún er timburkirkja, með turni og nokkru sönglofti, og tekur um 90 manns í sæti. Kirkjan var byggð af Friðrik Péturssyni (1820-1872) smið en sonur hans var séra Friðrik Friðriksson (1868-1961), hinn kunni æskulýðsleiðtogi í Reykjavík og átti hann heima á Svínavatni í bernsku.
Kirkjan á ýmsa góða gripi, svo sem altaristöflu frá 1904, eftir danskan málara, V.H. Vestergaard, sem var vinur séra Friðriks. Myndin sýnir Péur postula er hann var að sökkva á vatninu við hlið Meistara síns. Er það myndefni einsdæmi hér á landi og altaristaflan þeim mun merkilegri. Þegar kirkjan var reist bjó Helgi Benediktsson (1822-1899) frá Eiðsstöðum á Svínavatni. Hefur dugnaður hans, áræði og efnahagur verið í betra lagi er hann kom upp kirkjunni í því harðæri sem þá var í landinu. Kirkjan var afhent söfnuðinum nokkru fyrir 1950. Helgi hóf búskap á staðnum 1867 og síðan tók Jóhannes (1866-1946) sonur hans við. Var hann svo fimur að Páll Kolka læknir fullyrðir að hann færi sjötugur á skautum frá Svínavatni og alla leið út á Blönduós (Föðurtún). Eftir hans dag hafa börn hans búið á staðnum og sama ætin til 1973 eða í 116 ár .
Svínavatn sem bærinn stendur við er 11,78 km2, veiðivatn, ís á því oft ótryggur og ýmsir farist þar, þar á meðal nokkrir Auðkúluprestar. Þótti reimt þar fyrrum.
(Land þitt Ísland, Þorsteinn Jósepsson Steindór Steindórsson, 1980) og (Íslenska vegahandbókin 1998).
